اشعار عن الاستاذ3

سنة أربعين فى قرية في جوف الشمال

كانت بيوتها مشتتة

وكان الزمن لسع صبي وكان الليل

عقاب شتا

وكانت رياح الليل تعربد تمشي

بينات النخيل والضفه والموج

فى كتال

ومافى شي بجرح نعاس الليل

با حس الرواويس والمراكب

هاربه من برد الشمال

ونباح كلاب نص الليالى الصاحيات

والقمره شالعه على التلال

وفانوس يبقبق من على

شباك قديم

واطياف حريم

متلفعات خايفات من الليل والسديم

والحان بتطلع من حلق وتراً على

وش الفجر مبحوح بعد راح النديم

وهواكى بطلع من عبير نفس الشجر

من هدأة الليل البهيم

ومن سواليف السحر

ومن ترانيم البحر

يفرط عقد أيامي فى طبق النسيم

يا مهره من بر الصحارى الكبرى

يم ديساً مهدل فى الكتوف

زى غيمه فى آخر الليالى

زحمة مكاتيب بينى ما بينك

قمر نايم على دفن الدوالي

موال على درب النخيل والريح

مغارب فى شتا البر الشمالي

موسم طلاقات للربيع ومدن

مسوّره باللآلي

واعراس يفج فيها الزغاريد

والدلاليك فى السحر مخنوقه

تهبك كل ليله على التوالى

رمشك مظلات فى حمو الشمس

المداريه وعيونك طاقه

للغنا والسحاب

نفسك نسيم ليل الخريف

والقبلى شايل فى الصعيد

بعد اليباب

زولك حزين محقن سنين

الغربه عمره وعدى خلاهو

الشباب

قاعد على قهوة محطات العمر

يحسب سنين عمره المضن من

غير اياب

والليل مواكب ضجه والشارع ظلام

لا همسه لا خطوات بتعبر لا كلام

غير نهنهات صوت البكا الموجوع

بتمرق من شبابيك البيوت آهات

تؤثر فى العظام

بينى ما بينك معاني

وكلام حزين يا عمرى ما سووه

فى كتب الأغاني

وهواكي زى نار السّلم موقوده

فى جوفي وحشاى لهلابه

والشتا أربعاني

بينى ما بينك مصير

مسرجات الليل ومركب فى رياح

موسم مطير

صرخه فى الجبانه تسرح

فى حشا الليل الآخير

بينى ما بينك وطن

غابه للشوق والعصافير والشجن

ريح بتمرق من جدار الليل تغربل

زى طواحين الزمن

Read more: http://blue-nil.net/vb/showthread.php?t=11463#ixzz3qGPmkl30